Varietat tematica e estilistica definissen aguest nau libre qu'era colleccion Garona vos presente. Es autors dera tèrra, aranesi, compartissen espaci literari damb es escrivans der aute costat dera termièra, frais de lengua e cultura que mos apòrten d'auti matisi, d'autes paraules d'ua madeisha lengua mair que mos amasse. Açò li balhe ad aguest nau recuelh d'òbres guanhadores dera VIIau. edicion deth Prèmi literari Mn. Condò Sambeat, com as auti recuelhs presentadi enquia aué, eth perfum des cases damb es pòrtes dubèrtes, a on er aire fresc de dehòra se barrege damb era intimitat deth laguens. En literatura, com en d'auti ahèrs, d'açò ne poderíem díder "universalitat", conscients totun dera grandiositat dera pròpia paraula. S'ena varietat que i a eth gust, aciu que traparatz eth gust pera lectura de "bon hèr", de bon païr, de bon empassar. Es òbres e vèrsi d'aguestes planes an ua vertut simpla, mès essenciau: saber entretier, tocar era fibra, hèr arribar en lector petites istòries, bocins de vida que ben poderie èster era sua. En definitiua li saben apropar ahèrs, sentiments e paraules a on amiralhà-se e identificà-se.